香港樓巿

雖然依家租樓住，但間唔時都會有留意樓巿。近日比較熱門當然係居屋重售，其中牛池灣嘉峰臺同沙田愉翠田苑位置都幾好。不過嘉峰臺平均呎價要成2400，真係唔知白表申請人如何可以afford得起，白表申請兩人家庭上限22,000，假設600呎樓大約140萬，10%首期，加埋普通裝修廿萬無走雞，依家5厘息每月大約供8000幾。如果兩公婆無細路，每個月剩13000都好好洗，但若然要養小朋友或者老豆老媽子咁就幾難捱。照咁計，1800蚊呎既愉翠苑可能更加好，起碼附近有新城巿廣場，而嘉峰臺只係得個鑽石山廣場。

除左居屋重售，近其推出既兩個新樓盤都好注目，注目原因係訂價非常進取(離譜)。第一個係馬鞍山"男戇"，最低呎價由4700起，向海單位可以貴到8000蚊呎。第二個係"慢黑頓山"，向美孚新村隔離，荔枝角同美孚中間。最平600幾呎單位要400幾萬，搵鬼買咩，又唔係方便過人，點解唔買美孚新村!?就算配套、用料再好，都唔覺得會值多二百萬。我諗只有傻仔先會比人昆入巿，預售情況都係吹水多，仲要封盤想再加價，發展商真係賺得盡!